Nyheiter frå skulen Archives - Møre folkehøgskule

Møre folkehøgskule tek i bruk digital studierettleiar

Webmaster — Fri, 06 Mar 2026 10:08:28 +0000

Møre folkehøgskule tek i bruk digital studierettleiar – gjer det enklare å finne rett linje

Møre folkehøgskule har no teke i bruk ein ny digital linjerettleiar på nettsidene sine. Målet er å gjere det enklare for framtidige elevar å finne den linja som passar best for dei – enten dei drøymer om eventyr i fjell og fjord, kreative prosjekt eller reiser ut i verda.

Skulen har sjølv utvikla den digitale rettleiaren som er basert på kunstig intelligens (AI/KI) og fungerer som ein digital studierådgivar. Her kan besøkande stille spørsmål, få hjelp til å vurdere ulike linjer og få forslag til kva som kan passe best ut frå interesser og ønskje.

– For mange kan det vere vanskeleg å velje mellom ulike linjer og skular. Med den digitale linjerettleiaren ønskjer vi å gjere det enklare å utforske moglegheitene og finne fram til det året som kan bli det rette for deg, seier rektor Rune Hovde ved Møre folkehøgskule.

Den nye løysinga er ein del av skulen si satsing på å ta i bruk ny teknologi for å styrke elevopplevinga – både før, under og etter skuleåret.

– Vi ønskjer å vere blant dei folkehøgskulane i landet som er best til å bruke ny teknologi på ein klok måte. Målet er ikkje teknologi i seg sjølv, men å bruke AI og digitale verktøy til å skape ein betre skule der elevane står i sentrum for alt vi gjer, seier Hovde.

Møre folkehøgskule ligg midt i Sunnmørsalpane, omgitt av fjord, fjell og hav. Skulen tilbyr linjer innan friluftsliv, idrett, kreative fag og reiser, og tek kvart år imot elevar frå heile landet som ønskjer eit år fylt med opplevingar, utvikling og nye vennskap.

Den digitale linjerettleiaren er no tilgjengeleg på skulen si heimeside og skal gjere det lettare for kommande elevar å utforske tilbodet og finne si eiga draumelinje.

– Vi håper dette kan vere eit nyttig verktøy for alle som vurderer folkehøgskule, og at det gjer vegen frå nysgjerrigheit til søknad litt enklare, seier Hovde.

The post Møre folkehøgskule tek i bruk digital studierettleiar appeared first on Møre folkehøgskule.

VERVEKAMPANJE

Webmaster — Wed, 04 Feb 2026 12:32:50 +0000

VERVEKAMPANJE: Ta med ein venn – få 1000 kroner kvar

Har du gått på Møre folkehøgskule, er du elev no – eller skal du starte til hausten? Då kan du invitere ein venn til å søkje, og få vervebonus når vennen startar hos oss.

Folkehøgskuleåret blir endå betre når du deler det med nokon. Difor gir vi vervebonus til deg som anbefaler skulen til ein venn som faktisk startar.

Når den du verver får plass, betaler innmeldingsavgifta og angrefristen på 14 dagar er ute, får de 1000 kroner kvar.

Du kan verve fleire — bonus gjeld per elev.

SØK HER!

Kven kan få vervebonus?

Noverande elevar
Tidlegare elevar
Dei som har takka ja til plass komande skuleår

Slik gjer du det

Steg 1 – Del tipset

Fortel ein venn om skulen og linjene våre.

Steg 2 – Vennen søker

Vennen sender søknad om plass.

Steg 3 – Registrer vervar

Vennen oppgir namnet ditt i søknaden eller i verve-skjemaet.

Steg 4 – De får bonus

Når plassen er stadfesta, innmeldingsavgifta betalt og angrefristen ute, betaler vi ut bonus til begge.

Klar til å verve?

Registrer tipset ditt her — det tek under eitt minutt.

SØK HER!

Vilkår for vervebonus

Gjeld berre nye elevar
Bonus blir utbetalt etter betalt innmeldingsavgift
Same elev kan berre knytast til éin vervar
Utbetaling skjer samla eller fortløpande
Skulen kan avslutte kampanjen ved behov

Når får vi utbetalt bonusen?

Etter at innmeldingsavgifta er registrert betalt.

Kor mange kan eg verve?

Så mange du vil. Bonus per elev.

Må vi gå på same linje?

Nei, alle linjer tel.

Kan nye søkarar også vere vervar?

Ja — dersom dei har takka ja til plass.

The post VERVEKAMPANJE appeared first on Møre folkehøgskule.

Nye linjer for skuleåret 26-27

Webmaster — Tue, 03 Feb 2026 13:11:37 +0000

Møre folkehøgskule går no inn i ein ny fase av utviklinga si. Frå skuleåret 2026–2027 får heile skulen ein tydlegare felles struktur der fellesskapet mellom linjene blir sett i sentrum. Målet er å skape eit endå sterkare sosialt miljø – på tvers av interesser, fag og reisemål.

– Vi har hatt fleire år med mykje linjefokus og mange ulike aktivitetar. No ønskjer vi å binde dette saman og løfte fram det som gjer Møre heilt spesielt: at vi er éin skule, éin gjeng og éin fellesskap, seier rektor Rune Hovde.

Møre – eit symbol på samhald

Som eit konkret grep blir den nye felles utanlandsturen Escape Møre eit sentralt element i den nye strukturen. Turen skal gjennomførast mellom oktober og desember, og samla alle elevane – uavhengig av linje – til ei felles oppleving i varmare strøk.

– Escape Møre handlar ikkje berre om sol og eventyr, men om å reise saman som skule. Vi skal oppleve noko nytt, utfordre oss sjølve og bli betre kjent på tvers av linjene. Fellesskapet som blir skapt der, varer heile året, seier Hovde.

Sterkare felles identitet

Dei ulike linjene vil framleis ha sine eigne særpreg og reiser, men det felles prosjektet skal bidra til å knyte alt saman. Elevane skal kjenne at uansett kva linje dei går på, er dei ein del av Møre-fellesskapet.

– Når elevane kjem heim frå Escape Møre, vil dei ha eit felles minne og eit sterkare “vi”. Det gir oss betre trivsel, meir samarbeid og ein kultur som varer, seier Hovde.

Byggjer vidare på styrkane våre

Endringa kjem som del av eit større strategiarbeid der Møre folkehøgskule har gått gjennom heile linjeporteføljen og samla skulen rundt felles verdiar: ekte opplevingar, ekte fellesskap og ekte vekst.

– Vi skal halde fram med å tilby varierte linjer og spennande reiser, men med tydelegare struktur og meir felleskap på tvers. Dette er Møre slik vi vil vere i framtida, seier Hovde.

Linjene våre for skuleåret 26-27:

Pulse & Power // Friluftsliv, Idrett og Trening
Tidlegare kjend som Multisport X // Thailand. Linja har fått nytt namn, men held fast på det som fungerer: variert aktivitet, treningsglede og sterke opplevingar – med lang studietur til Thailand midt på vinteren.

Surf & Summit // Topptur, Klatring, Ski og Surf
Byggjer vidare på dei mest actionfylte friluftslivstilboda våre. Her får du høg puls i fjell og ved hav, med toppturar, klatring og surf – og studietur til Bali som årets store høgdepunkt.

Asia Unlocked // Språk, Kultur, Reise og Mat
Ei vidareføring av den tidlegare Kina/Japan-linja. No opnar vi døra til meir av Asia, med fokus på språk, kultur og matopplevingar – og studietur til både Kina og Japan.

Wander & Wonder // Verda som klasserom
Ei moderne reiselinje for deg som vil oppleve meir og planlegge sjølv. Du lærer å utvikle og gjennomføre eigne reiser – med elevstyrt studietur og verda som læringsarena.

Frame by Frame // Story, Film og Foto
Har røter i animasjonsfaget vårt, men er no breiare og meir retta mot visuell historieforteljing. Du jobbar med film, foto og kreative uttrykk – og reiser til Japan på studietur.

Peaks & Pixels // Fjell, Fjord og Gaming
Ei ny linje som kombinerer ekte naturopplevingar med digital kultur. Her vekslar du mellom fjellturar og gaming – med studietur til Japan som felles møtepunkt.

Sea & Soul // Kropp, Sinn og Balanse
Utvikla for deg som vil ha meir ro, retning og balanse i kvardagen. Linja kombinerer aktivitet, livsmeistring og fellesskap – med studietur i Europa.

The post Nye linjer for skuleåret 26-27 appeared first on Møre folkehøgskule.

No får du Catering frå Møre folkehøgskule!!

Webmaster — Fri, 30 Jan 2026 11:32:50 +0000

Frå august 2026 er det vi som er Asko-mat!

Meir informasjon om dette og muligheita til å leige lokale for møte eller selskap kjem snart her!

The post No får du Catering frå Møre folkehøgskule!! appeared first on Møre folkehøgskule.

Open dag på Møre folkehøgskule laurdag 7. februar!

Webmaster — Fri, 30 Jan 2026 10:26:49 +0000

Open dag på Møre folkehøgskule – velkomen til ein dag full av liv, aktivitetar og engasjement

Laurdag 7. februar inviterer Møre folkehøgskule til open dag frå kl. 11.00 til 15.00.
Denne dagen opnar vi dørene og ønskjer heile lokalsamfunnet velkomen – både små og store – til å oppleve skulen, elevane og kvardagen vår på nært hald.

Open dag er ei flott moglegheit til å bli betre kjend med Møre folkehøgskule, sjå kva vi driv med og møte engasjerte elevar som gjerne deler av kvardagen sin. Samstundes ønskjer vi å vere synlege og tilgjengelege i nærmiljøet, og skape ein dag prega av fellesskap, aktivitet og glede.

All inntekt frå sal denne dagen går til skulen sine bistandsprosjekt. Elevane våre samlar kvar år inn pengar og deltek på bistandsprosjekt kring om i verda. Ved å ta turen på open dag, er du med og støttar dette viktige arbeidet.

Program for dagen

Kl. 11.00 – dørene opnar

Aktivitetar i hovudbygget

Kafé i matsalen: Sal av kaker, sveler, kaffi og saft – og tombola
Matlaging ute: Bålpanne med grilling av pølser og pinnebrød, samt servering av kakao
Kjøkkenstova: Kaffibar og ansiktsmåling
Formingsrommet: Dekorer din eiga keramikk-kopp
A-salen: Visning av videoar om hjelpeprosjekta og om linjene våre.
B-salen: Kino og popcorn – filmar for barn
C-salen: Prøv kalligrafi, hjernetrim eller knutekunst
Peisestova: Open mic – likar du å synge eller spele? Scena er di

Aktivitetar i gymsalbygget

Gymsalen: Bruskasseklatring, klatrevegg og ballspel
Internatkjøkkenet: Sal av mat frå Thailand. Kanskje kan du lære korleis du lagar det også?
Foajeen: Prøv biljard, bordtennis eller airhockey
Animasjonsklasserommet: Introduksjon til animasjon

Vi håpar mange tek turen og blir med på ein innhaldsrik og kjekk dag på Møre folkehøgskule.
Velkomen til open dag!

The post Open dag på Møre folkehøgskule laurdag 7. februar! appeared first on Møre folkehøgskule.

Kinaklassen tek av – språk, kultur og studietur i sikte

Webmaster — Mon, 22 Dec 2025 14:04:53 +0000

4 månader på folkehøgskule kan høyrest kort ut, men for kinaklassen har tida gått i rasande fart. Sidan skulestart har elevane kasta seg ut i språk, kultur og opplevingar – og læringskurva har vore bratt.

Allereie no meistrar mange i klassen over 150 kinesiske teikn, både munnleg og skriftleg. Ein enkel samtale på mandarin? Det går heilt fint. I tillegg har elevane sunge kinesiske songar, dansa, sett dokumentarar og jobba i grupper med kinesisk historie, kultur og tradisjonar. Mahjong er lært, knutekunst er testa, tekulturen er utforska – og morgongymnastikk har vore ein effektiv start på dagen i mørketida.

Som om ikkje det var nok, har klassen også starta med grunnleggande japansk. Dermed får elevane utforske endå meir språk og kultur frå Aust-Asia.

– Vi er på veg til å bli ekte asiatere, seier fleire i klassen med eit smil.

No er også destinasjonane for årets studietur bestemte, og førebuingane er godt i gang. Det er mykje planlegging, høg stemning og stadig meir reisefeber.

Heime på Sunnmøre har klassen vore på tur til fugleøya Runde, besøkt vakre Romedalen og vore på fleire fjellturar rundt Ørsta. Bålkos og aking frå gapahuken har blitt faste innslag i kvardagen.

På kjøkkenet har elevane laga både sushi og kjende kinesiske rettar som kung pao-kylling, kinesiske bollar med heimelaga vaniljesaus, vårrullar og kinesiske pannekaker – så her er det berre å glede seg til juleferien.

Elevane bloggar jamleg om kvardagen sin, og for den som er nysgjerrig, kan ein følgje med på www.kinaklassen.com. Klassen er også å finne på Instagram: @asia_unlocked_morefhs.

Vi ønskjer alle ei riktig god jul!
圣诞快乐！メリークリスマス！

The post Kinaklassen tek av – språk, kultur og studietur i sikte appeared first on Møre folkehøgskule.

40% stipend blir vidareført!

Webmaster — Wed, 03 Dec 2025 08:40:04 +0000

40 prosent omgjering til stipend blir vidareført – stor jubel på Møre folkehøgskule

Det er jubel og lettelse i folkehøgskulemiljøet etter at det i natt blei klart: Neste års elevar får likevel gjort om 40 prosent av studielånet sitt til stipend, slik ordninga har vore dei siste åra. For ein folkehøgskuleelev kan dette utgjere inntil 40.000 kroner for eit år.

Folkehøgskuleelevar får, som andre studentar, støtte som lån frå Lånekassen. Når dei fullfører året utan for stort fråvær, blir 40 prosent av lånet gjort om til stipend – pengar dei slepp å betale tilbake. Denne ordninga har vore avgjerande for mange som vurderer eit folkehøgskuleår.

Difor kom forslaget i regjeringa sitt framlegg til statsbudsjett brått og overraskande: Kutt av stipenddelen frå 40 til 15 prosent. Forslaget utløyste sterke reaksjonar over heile landet.

Massiv motstand

Protesten lét ikkje vente på seg. Elevråd, rektorar, tidlegare elevar og foreldre engasjerte seg, skreiv lesarinnlegg og deltok i den offentlege debatten. Det har vore tallause medieoppslag, dei fleste svært kritiske til forslaget. Både Ørsta kommune og Møre og Romsdal fylkeskommune vedtok uttaler der dei bad om at forslaget vart reversert.

Samtidig signerte over 35.000 personar ei underskriftskampanje for å stanse kuttet. Representantar frå folkehøgskulane – både elevar og rektorar – overrekte underskriftene til dei fire partia som forhandla om statsbudsjettet.

Glede og lettelse på Møre folkehøgskule

På Møre folkehøgskule er reaksjonen eintydig: glede, lettelse og stor takk til alle som engasjerte seg.

– Dette er ei stor dag for folkehøgskulane, og for alle unge som ønskjer eit utviklande og inkluderande år utan at økonomien skal vere eit hinder, seier rektor Rune Hovde. – Eg er imponert over innsatsen til elevane våre, tilsette, lokal- og fylkespolitikarane og alle andre i som ser den viktige jobben folkehøgskulane gjer og som stod opp for saka.

At 40-prosentordninga no blir vidareført, betyr at folkehøgskulen framleis blir for alle.Elevane får eit år der dei både lærer og veks som menneske – og at Møre folkehøgskule framleis kan vere eit trygt og tilgjengeleg alternativ for ungdom frå heile landet og verda.

The post 40% stipend blir vidareført! appeared first on Møre folkehøgskule.

Fjorårstreff blir 23. -25. januar 2026!!!

Webmaster — Wed, 19 Nov 2025 11:53:06 +0000

Tradisjonen tru blir det treff for fjorårselevane på Møre folkehøgskule!

Dette blir helga 23. – 25. januar 2026, og vi satsar på fantastiske snøforhold, stor stemning og hjartelege gjensyn!

Sjå kullet si Facebookside for meir informasjon og påmelding!

The post Fjorårstreff blir 23. -25. januar 2026!!! appeared first on Møre folkehøgskule.

Endrar struktur – løfter fram fellesskapet på Møre

Webmaster — Thu, 30 Oct 2025 07:55:46 +0000

Escape Møre blir eit felles høgdepunkt for alle linjene

Escape Møre – eit symbol på samhald

Sterkare felles identitet

Dei ulike linjene – frå Surf & Summit til Sea & Soul – vil framleis ha sine eigne særpreg og reiser, men det felles prosjektet skal bidra til å knyte alt saman. Elevane skal kjenne at uansett kva linje dei går på, er dei ein del av Møre-fellesskapet.

– Når elevane kjem heim frå Escape Møre, vil dei ha eit felles minne og eit sterkare “vi”. Det gir oss betre trivsel, meir samarbeid og ein kultur som varer, seier Hovde.

Byggjer vidare på styrkane våre

– Vi skal halde fram med å tilby varierte linjer og spennande reiser, men med tydelegare struktur og meir felleskap på tvers. Dette er Møre slik vi vil vere i framtida, seier Hovde.

The post Endrar struktur – løfter fram fellesskapet på Møre appeared first on Møre folkehøgskule.

Nye linjer for skuleåret 26-27 er no klare!

Webmaster — Tue, 14 Oct 2025 09:30:44 +0000

Nye linjer – nytt eventyr for Møre folkehøgskule.

Sju heilt nye linjer, felles utanlandstur og eit meir samla skuleår frå hausten 2026.

Møre folkehøgskule går inn i framtida med eit sterkt og moderne linjetilbod for skuleåret 2026–2027. Etter over 125 år med folkehøgskuletradisjon og mange populære linjer innan reise, friluftsliv, idrett og kultur, lanserer skulen no sju heilt nye linjer som speglar både dagens ungdom og framtidas folkehøgskule.

– Dette er ei fornying som både byggjer på røtene våre og peikar tydeleg framover, seier rektor Rune Hovde. – Vi ønskjer å gi ungdommar eit år med ekte opplevingar, fellesskap og læring – frå Sunnmørsalpane til verda.

Sju linjer – eitt mål: å oppleve, lære og leve

Dei nye linjene kombinerer reiselyst, meistring og kreativitet på måtar som passar dagens ungdom. Frå toppturar og surfing til gaming, filmproduksjon og yoga – alle finn noko som gir meistring, energi og opplevingar for livet.

Surf & Summit // Topptur, Klatring og Surf
Den originale Bali-linja får nytt liv – no med sterkare fokus på kontrastane mellom tindar og tropiske strender. Frå puddersnø på Sunnmøre til surfing på Bali.
Pulse & Power // Friluftsliv, Idrett og Trening
Ei energisk linje for deg som vil vere aktiv, men utan prestasjonspress. Kombiner fjellturar, ballspel og trening med studietur til Thailand.
Asia Unlocked // Språk, Kultur og Mat
Lær språk, smak kultur og opplev Asia frå innsida – i Kina og Japan. Ei vidareføring av skulen si lange reisehistorie i Asia.
Wander & Wonder // Verda som klasserom
Planlegg og gjennomfør reiser sjølv – frå idé til gjennomføring. Ei linje for dei som vil reise med ansvar, refleksjon og eventyrlyst.
Frame by Frame // Story, Film og Foto
Skap di eiga historie gjennom film, foto og SoMe. Kombiner Sunnmørsnatur og kreativ produksjon – med reise til Japan som inspirasjon.
Peaks & Pixels // Fjord, Fjell og Gaming
Ein heilt ny og unik kombinasjon av gaming, streaming og friluftsliv. Opplev Japan sitt gamingunivers og snøparadis på same tur.
Sea & Soul // Kropp, Sinn og Balanse
Ei linje for deg som vil finne ro, energi og fellesskap – med yoga, padling og reise til sol og varme i Europa.

Felles utanlandstur for første gong: Møre Escape

For første gong i skulen si historie får alle elevar reise på ein felles utanlandstur i november – Møre Escape.
Heile skulen reiser då til varme strøk for ei veke med sol, aktivitetar og fellesskap på tvers av linjene.

– Dette blir ein ny tradisjon, seier rektor Hovde. – Det er noko heilt spesielt når 70–80 ungdommar får dele opplevingar utanfor klasserommet. Det byggjer samhald og gir energi til resten av året.

Turen blir lagt til destinasjonar som kombinerer sol, fellesskap og aktivitet – og markerer starten på vinterhalvåret med ein vitamininnsprøyting for både kropp og sjel.

Studieturar mellom vinter- og påskeferie

Ei viktig nyvinning er at alle linjene no har sine studieturar mellom vinter- og påskeferien.
Det gir eit meir samla og balansert skuleår, med betre tid til valfag, fellesaktivitetar og prosjekt både før og etter turane.

– Det betyr at heile skulen er samla både i starten og slutten av året. Vi får meir fellesskap, meir ro i kvardagen og betre moglegheit til å bruke Sunnmørsalpane gjennom heile skuleåret, forklarer Hovde.

Reisene varer frå 2 til 4 veker og går til nokre av verdas mest spennande destinasjonar: Bali, Thailand, Kina, Japan og ulike land i Europa.
Skulen har lang erfaring med desse reisene – lærarane har budd og jobba i landa, og samarbeider med lokale partnarar for å skape opplevingar som er både trygge, berekraftige og ekte.

Frå tradisjon til framtid

Møre folkehøgskule har gjennom fleire tiår vore kjent for linjer som Friluftsliv X, FIT, Midtens rike, Bali-linja og Multisport X.
Den nye porteføljen er ei vidareføring av alt det beste frå desse – men oppgradert med ny profil, ny struktur og ei tydeleg retning.

– Vi har lytta til ungdommen. Dei ønskjer opplevingar, men også balanse. Dei vil reise, men forstå verda. Dei vil bruke kreativitet, men kjenne fellesskap. Dette skal linjene våre spegle, seier Hovde.

Med slagordet «Eitt år. Ditt eventyr.» vil Møre folkehøgskule no treffe ei ny generasjon søkjarar – og samstundes halde fast på kjernen: menneskelege møte, meistring og læring gjennom opplevingar.

Framtidsretta folkehøgskule – med røtene i Sunnmøre

Sjølv om reiselysta er stor, er Møre folkehøgskule først og fremst eit skulefellesskap rotfesta i Sunnmørsnaturen – omgitt av fjordar, fjell og hav.
Her får elevane eit år der kontrastane er store: frå vinter på Standalshytta til snorkling i tropiske vatn.

– Vi skal vere den folkehøgskulen som kombinerer verdsopplevingar med ekte folkehøgskuleliv. Her handlar det like mykje om å finne seg sjølv som om å finne nye stadar, avsluttar rektor.

Vil du vere ein del av det nye Møre-eventyret?
Les meir om linjene våre og søk plass for skuleåret 2026–2027 på www.more.fhs.no

The post Nye linjer for skuleåret 26-27 er no klare! appeared first on Møre folkehøgskule.